#78 - 216-217-218 நாமங்கள் - ப்ரஸன்ன ஸ்ரீவிஷ்ணு ஸஹஸ்ர நாம ஸ்தோத்ர பாஷ்யம்

ஸ்ரீபிரஸன்ன ஸ்ரீனிவாஸ தாஸர் இயற்றிய

ப்ரஸன்ன ஸ்ரீவிஷ்ணு ஸஹஸ்ர நாம ஸ்தோத்ர பாஷ்ய

கன்னட கிருதியின் தமிழ் அர்த்த விளக்கங்கள்

எழுதுபவர் : ‘ஜகன்னாத கேசவ’ சத்ய நாராயணன்

*** 

216. ஸ்ரீ தா⁴ம்னே நம:

ஸோமார்க்காதி³ க்³ரஹதே³வதெ பு³த்³தி⁴ ஹொளிஸுவி நீ

‘தா⁴ம’ நமோ தேஜோரூபவான் தா⁴ம நாமா

ஸோம ஸூர்யாதி³க³ள பு³த்³தி⁴ க்ரியா நின்னிந்த³லேவெ

தம்ம தம்ம ப்ரகாஶனாதி³க³ளன்னு மாடு³வரு 

சந்திரன், சூரியன் ஆகிய கிரகங்களில் இருந்து அவர்களுக்கு ஒளி கொடுப்பவனே ‘தாமனே’ உனக்கு என் நமஸ்காரங்கள். ஒளி பொருந்தியவனே. தாம என்று அழைக்கப்படுபவனே. அந்த சந்திரன், சூரியன் ஆகியோர்களின் புத்தி, செயல்கள் உன்னாலேயே நடக்கின்றன. உன்னாலேயே அவர்கள் மற்றவர்களுக்கு ஒளி கொடுக்கிறார்கள். 

217. ஸ்ரீ ஸத்யாய நம:

ப⁴க்தரிகெ³ உத்தமவாத³ போ⁴க³ ஒத³கி³ஸுவி

‘ஸத்யனே’ நமோ ஸதத ப⁴க்தவத்ஸலனெ ஸ்ரீஶ

தத்தத்காலதி³ ப⁴க்தேஷ்டதா³த ஹிதகரனு நீ

ஸந்தத ப்ரியகர ஸாது⁴ பரிபால கருணி

பக்தர்களுக்கு மிகச்சிறந்ததான போகத்தை அருள்பவனே ‘ஸத்யனே’ எப்போதும் உன்னை வணங்குகிறேன். பக்தவத்ஸலனே. லட்சுமிதேவியின் தலைவனே. அந்தந்த (தக்க) காலங்களில் பக்தர்களின் இஷ்டங்களை நிறைவேற்றுபவனே. இதம் அளிப்பவனே. நீ எப்போதும் அனைவருக்கும் ப்ரியமானவனாக இருக்கிறாய். ஸஜ்ஜனர்களுக்கு அருள்பவனே. கருணைக் கடலே. 

218. ஸ்ரீ ஸத்யபராக்ரமாய நம:

ஸோமாதி³ ஸாது⁴ யக்ஞரதராத³வர க்³ருஹதி³

ரமாயுக் வாஸமாள்பி ‘ஸத்யபராக்ரம’ நமஸ்தே

பி³ரம்மவாய்வர்க்காதி³ ஸத்யர பராக்ரம நின்னிந்த³

வாமன த்ரிவிக்ரம ஸத்யசாரி ப³லிகொ³லிதி³ 

ஸோமயக்ஞ முதலான யக்ஞங்களை செய்பவர்களின் வீட்டில் ஸ்ரீலட்சுமிதேவி உடன் வசிக்கிறாயே. ‘ஸத்யபராக்ரமனே’ உன்னை வணங்குகிறேன். பிரம்ம, வாயு, சூரியன் ஆகியோரின் பராக்கிரமங்கள் (செயல்கள்) உன்னாலேயே நடக்கின்றன. வாமனனே. த்ரிவிக்ரமனே. உண்மையை பேசி பின்பற்றியவனான பலிச் சக்கரவர்த்திக்கு அருளியவனே.

***